Jurist (førstekonsulent/ rådgjevar/seniorrådgjevar)

Olje- og gassavdelinga Olje- og gassavdelinga skal bidra til å gjennomføre petroleumspolitikken som er fastsett av Stortinget og regjeringa. Avdelinga skal vidareutvikle petroleumspolitikken for å leggje til rette for at måla for petroleumsverksemda blir nådde. I tillegg ligg nye område som havbotnmineralverksemd og transport og lagring av CO2 innanfor ansvarsområdet til avdelinga. Jurist i petroleumsjuridisk seksjonPetroleumsjuridisk seksjon er ein av fem seksjonar i Olje- og gassavdelinga, og har ni tilsette. Seksjonen har ei sentral rolle ved å behandle alle juridiske problemstillingar som er relevante innanfor ansvarsområdet til avdelinga. I tillegg til å arbeide med juridiske tema som gjeld petroleumsverksemda og CO2-lagringsprosjekt, har seksjonen òg ansvar for havbotnmineralverksemda som sådan. Vi arbeider mellom anna med saker om vidareutvikling av rammeverket for aktørane i olje- og gassnæringa, tildeling av konsesjonar og løyve, feltutbyggingar, drift av felt og anlegg, røyrtransport og infrastrukturregulering, samtykkebehandling av transaksjonar knytte til eigardelar/selskap og planar for nedstenging av felt og anlegg, og forvaltning av Noregs energi- og mineralressursar i norske havområde. Vi har òg ansvaret for gjennomføring av tryggingslova i olje- og gassektoren. I tillegg arbeider seksjonen med EU-/EØS-rettslege spørsmål og traktatar. Seksjonen er òg engasjert i ulike internasjonale forum og i bilaterale saker med andre land knytte til petroleum, havbotnmineral og CO2-transport og -lagring. Seksjonen er òg kontaktpunkt mot Regjeringsadvokaten i saker som gjeld ansvarsområdet til avdelinga, og har ansvaret for kontakten med eksterne advokatforbindelsar. Dei konkrete arbeidsoppgåvene kan vere innanfor alle områda til seksjonen og vil typisk omfatte deltaking i møte med selskap og andre styresmakter om aktuelle saker, vurdering av søknader, utforming og kvalitetssikring av vedtak, utforming av forskriftstekst og rettleiing til selskap. Har du erfaring med EU-/EØS-rettslege spørsmål, eller ei særleg stor interesse for området, er det ein fordel. Samstundes ønskjer vi kvalifiserte kandidatar som blir uteksaminerte i år, velkomne til å søkje. KvalifikasjonarNødvendige kvalifikasjonar Master i rettsvitskap med gode resultat God skriftleg og munnleg framstillingsevne på norsk og gode kunnskapar i engelsk Ønskjelege kvalifikasjonar God kjennskap til EU-/EØS-rett Forståing for energipolitikk og næringsliv Interesse for internasjonalt arbeid Personlege eigenskapar Vi søkjer deg som er ansvarsmedviten, sjølvstendig, strukturert og har gode evner til samarbeid. Du har høg arbeidskapasitet, tek initiativ og er god på framdrift og gjennomføring. Den som blir tilsett må kunna tryggleiksklarerast etter tryggingslova. Vi tilbyrInteressante og utfordrande oppgåver i skjeringspunktet mellom fag og politikk Høve til fagleg utvikling i eit positivt og godt arbeidsmiljø Lønsspenn frå kr 600 000–900 000. For særleg kvalifiserte søkjarar kan høgare løn vurderast. Fleksibel arbeidstid, pensjonsordning og betalt overtid I tillegg får du alle godane ved å vere tilsett i staten; mellom anna fleksitid, sommartid og medlemskap i Statens pensjonskasse, noko som inneber tenestepensjonsordning og yrkesskade- og gruppelivsforsikring. Du får òg høve til å trene i arbeidstida. Generell informasjonSøknad: Vitnemål, karakterutskrifter og relevante attestar må leggjast ved søknaden. Søkjarliste: Opplysningar om søkjarane kan offentleggjerast sjølv om du har bedt om å bli unnateken frå søkjarlista, i samsvar med offentleglova § 25. Bakgrunnssjekk: Vi utfører bakgrunnssjekk av kandidaten som skal tilsetjast. Tilsetjing føreset at denne blir godkjend.  Mangfald og inkludering: Energidepartementet meiner at inkludering og mangfald er ein styrke, og ønskjer medarbeidarar med ulik kompetanse, fagkombinasjon, livserfaring og perspektiv for å bidra til å løyse oppgåvene våre endå betre. Skriftspråk: Bokmål og nynorsk er likestilte skriftspråk. Som offentleg verksemd skal Energidepartementet ha nødvendig kompetanse til å bruke begge målformene. Det er viktig at medarbeidarane våre kan bidra til dette. Du kan lese meir om rekrutteringsprosessen vår og korleis det er å jobbe i Energidepartementet på www.jobbienergidepartementet.no